Paris Saint-Germain ka fituar bindshëm 5-1 ndeshjen kundër Basaksehir, që do të mbahet mend në historinë e futbollit për fyerjen raciste të arbitrit të katërt.
Një fyerje që bëri xhiron e botës dhe që solli shtyrjen e ndeshjes për ditën e sotme.
Ka qenë një sfidë pa histori ajo e luajtur në Paris, me vendasit që kanë dominuar nga minuta e parë deri tek e fundit, siç e tregon edhe rezultati.
Protagonist absolut i takimit ka qenë Neymar, autor i tre golave.
O Ney është bërë lojtari i parë në historinë e Kupës së Kampionëve/Champions League që shënon 20 gola për dy skuadra të ndryshme (Barcelona dhe PSG).
Dy golat e tjerë janë shënuar nga Mbappe, që është zhbllokuar më në fund në Champions pas 364 ditësh. Goli i fundit i realizuar nga francezi në kompeticion ka qenë në fazën me grupe të edicionit të kaluar, në fitoren 5-0 kundër Galatasaray.
PSG , që e kishte siguruar kualifikimin në 1/8-at që ditën e djeshme falë fitores së Leipzig kundër Manchester United, e ka mbyllur Grupin H me 12 pikë.
