Humori është i lartë te Milan-i, pasi eliminoi Tottenham-in nga Champions League dhe siguroi një vend në çerekfinale.
Teksa pret të njohë kundërshtarin e radhës europian të premten e 17 marsit, Pioli ka qartësisht në mendje ndeshjen e kampionatit ndaj Salernitana-s.
‘Djalli’ duhet t’u japë vazhdimësi rezultateve të mira për të shpresuar të futet mes katër të parëve në Serinë A dhe në edicionin e ardhshëm të Champions League. Të ardhurat që klubi kuqezi pret të marrë do të shërbejnë kryesisht për të forcuar ekipin për sezonin 2023/24.
Një nga repartet që me siguri do të ketë nevojë për ndërhyrje është sigurisht sulmi. Ende nuk është vlerësuar fati i Ibrahimovic-it, kontrata e të cilti skadon në qershor dhe së fundmi është rikthyer pas një dëmtimi shumë të gjatë.
Mosha gjithashtu ka filluar të rëndojë mbi Giroud, i cili nuk do të jetë në gjendje t’i luajë të gjitha ndeshjet sezonin e ardhshëm: kjo është arsyeja pse Milan duket se ka identifikuar goditjen e madhe për merkaton e verës.
Sipas asaj që u raportua sot nga ‘La Gazzetta dello Sport’, Milan-i synon të marrë një sulmues të ri. Konfirmimet që mbërrijnë në lidhje me profilin e Folarin Balogun, që luan për Reims, por është në pronësi të Arsenal-it. Sulmuesi anglez, me nënshtetësi nigeriane, është një nga lojtarët e rinj më të ndjekur në Europë.
I lindur në vitin 2001, ai tashmë ka shënuar 16 gola dhe ka dhënë 2 asist në 27 paraqitje mes Ligue 1 dhe Kupës së Francës. Numrat që duket se kanë bindur Maldini-n dhe Massara-n të përpiqen të hidhen në sulm, pavarësisht një vlerësimi të rëndësishëm nga Arsenali: jo më pak se 20-25 milionë euro.
Prandaj, goditja për sulmin e së ardhmes mund të jetë vetë Balogun, i gatshëm për t’u alternuar me Giroud sezonin e ardhshëm. Situata është në zhvillim, me kuqezinjtë gati për të qenë protagonistë në merkaton e verës së ardhme.
