Milan është gjithmonë dhe më afër një titulli në kampionat që do të ishte historik, një kthim te fitorja pas 11 vitesh pritje dhe shumë sezonesh zhgënjyes.
Ringjallja e Djallit ka ardhur kryesisht falë zgjedhjeve të bëra nga drejtuesit e klubit Nga njëra anë Gazidis dhe gjithë bordi, nga tjetra Maldini, Massara e Pioli.
Fitorja kundër Verona-s ka qenë një tjetër hap i rëndësishëm në garën me Inter-in, që mbetet dy pikë mbrapa në renditje. Tani, Milan-it do t’i mjaftojnë katër pikë në dy ndeshjet e fundit kundër Atalanta-s dhe Sassuolo-s për të festuar një titull që vitin e kaluar ka qenë një ëndërr e shuar në javët e fundit.
Një ecuri në rritje që përfaqësohet nga dy lojtarë si Rafael Leao dhe Sandro Tonali. Mesfushori është blerë përfundimisht nga Brescia, ka reduktuar rrogën dhe është blinduar deri në 2026-ën, duke rritur ndjeshëm vlerën e tij nga 20 në 50 milionë euro.
Portugezi, nga ana tjetër, ka një kontratë që skadon në 2024-ën dhe marrëveshja për rinovimin nuk është arritur akoma. Sipas Corriere della Sera, bisedimet kanë pësuar një ngadalësim.
Aktualisht, ish-ylli i Lille fiton 1.5 milionë euro në sezon dhe kuqezinjtë janë të gatshëm t’ia trefishojnë rrogën lojtarit me një marrëveshje deri në 2026-ën dhe 2027-ën.
Janë të shumta klubet që janë interesuar për lojtarin nga janari i kaluar. Kryesisht PSG e Leonardo-s, që duket se është e gatshme të ofrojë 70 milionë euro.
Paraqitjet e mira të lojtarit kanë gëzuar Milan-in, por kanë tërhequr edhe vëmendjen e klubeve të tjera të mëdha të Europës. Kështu, 4,5 milionë eurot e ofruara nga Maldini mund të mos mjaftojnë.
Nuk përjashtohet një sforcim i mëtejshëm nga ana e kuqezinjve, të cilët janë në pritje edhe të mësojnë identitetin e pronarëve të rinj.
